Chapter
9
1
Ku lunaku olweikumi n'eisatu olw'omwezi ogwetebwa Adari, ekirangiriro ekyali mu liina lya kyabazinga ekyasooka lwe kyali kija okuteebwa mu nkola.
2
Aye abazigu b'Abayudaaya n'abaazikirizibwa ku olwo. Woonawoona abantu baali batya Abayudaaya era nga ghazira waire omulala ati akana kubalwanisa.
3
Mu butuufu abafuzi ab'omu biketezo, n'abo abaakuliranga abantu, aghalala n'abaghandiisi b'obwakyabazinga, nga bagha Abayudaaya ekitiibwa olw'okutya Morodekai.
4
Kuba Morodekai yali mukologho mu kisaagaati ky'obwakyabazinga, era okumanhikana kwe kwabuna mu bwakyabazinga bwonabwona; kuba omusaadha ono Morodekai yeeyongera okuba ow'ekitiisa.
5
Kale Abayudaaya baaghangula abazigu baibwe boonaboona nga babakubisa mpiima, n'okwita n'okuzikiriza, era baakola nga bwe baayenda ku abo abaabakyaghanga.
6
Mu kibuga ekikulu kyene Susa, Abayudaaya baitamu abantu ebikumi bitaanu (500),
7
Ni Farisannesitaini, Delifoni, Fasiga,
8
Faradatha, Barea, Sarabaka,
9
Marimasima, Arufao, Arisao, ni Zabuthao.
10
batabane ba Hamani omwana wa Hammedatha, era omuzigu w'Abayudaaya—Baabaita. aye ebintu byaibwe tibaabinhagulula.
11
Olunaku lwene olwo omughendo ogw'abantu abaitibwa mu Susa baagukobera kyabazinga.
12
Kyabazinga yaakoba Esitheri ati: "Mu Susa mwonka, Abayudaaya baiseemu abantu ebikumi bitaanu (500). Me leero baise bameka mu biketezo ebindi eby'omu bwakyabazinga! Nkobera ekindi ky'oyenda era oidha kukifuna."
13
Esitheri yairamu ati: "Isebantu kyabazinga, bw'oba ng'osiimye, ganha Abayudaaya kye bakoze mu Susa olwaleero kabiri bakikole n'idho. Era lagira emirambo gya batabane ba Hamani eikumi bagirengeedheze ku mulabba."
14
Kyabazinga yaaganha Abayudaaya balengeedheze ku mulabba emirambo gya batabane ba Hamani eikumi, abantu bagibone.
15
Ku lunaku olweikumi n'eina olw'omwezi Adari, Abayudaaya ab'omu Susa beesoloza kabiri, baita abantu abandi ebikumi bisatu (300) mu kibuga. Aye ku olwo tibaanhaga bintu.
16
Abayudaaya abaali mu biketezo eby'obwakyabazinga, boona beesoloza okwerwanaku. Beewonia abazigu baibwe nga baita abantu omutwalo omulamba n'enkumi eitaanu (15,000) ku lunaku olweikumi n'eisatu olw'omwezi gwa Adari. Aye tibaanhaga bintu.
17
Ku lunaku olwairirira olweikumi n’eina olw’omwezi gwene ogwo tibaita bantu bandi kabiri. Era olunaku olwo
Abayudaaya baaluwuumula nga bali mu masanhu na mu kulya mbaga.
18
Aye Abayudaaya ab'omu Susa olunaku olweikumi n'eitaanu lwe baafuula olw'okuwuumula, kuba ku lweikumi n'eisatu ni ku lweikumi n'eina baali mu kutirimbula bazigu baibwe.
19
Era eyo n'ensonga lwaki Abayudaaya ababa mu bibuga ebitono batwala olweikumi n'eina olw'omwezi gwa Adari, nga n'olw'okuwuumula n'okugheerezagania ebirabo eby'emere. Ng'ate Abayudaaya ab'omu bibuga ebinene bakuza lwaikumi na itaanu nga n'olw'okuwuumula n'okugheerezagania ebirabo eby'emere.
20
Morodekai yaalagira ebyo ebyaligho baabighandiika mu bitabo, era baabigheereza Abayudaaya boonaboona abaali okumpi n'abaali eghala mu bwakyabazinga bw'e Perusia bwonabwona.
21
Baabaghandiikira okubakubiriza okukuumanga olunaku olweikumi n'eina n'olweikumi n'eitaanu mu mwezi gwa Adari nga dha kuwuumula.
22
Edho n'enaku Abayudaaya dhe beewonezaaku abazigu baibwe. Baali n'okukuuma omwezi gwonagwona nga gwa kuwuumula, kuba omwezi ogwo gwali guja kuba gwa nnaku na kuweesa isuubi. Aye nga buti gwafuulibwa gwa masanhu na kusagamba. Era baabakoba okukuumanga enaku edho nga balya mbaga, era nga bagheerezagania ni bakagwa baibwe emere n'ebirabo, baaghaaku n'abaghafu.
23
Abayudaaya baaganha okukola ebyo byonabyona Morodekai bye yabakoba ebyali mu kighandiiko ekyo.
24
Morodekai yaghandiika nga Hamani mutabane wa Hammedatha Omumakedonia bwe yalwanisa Abayudaaya. Era nga bwe yali abakoleire olukwe okubazikiriza, n'ataagho mwene eiteeka era n'akubisa obululu obwetebwa Puri okubazikiriza abamaliregho irala.
25
Era nga bwe yaja ye kyabazinga okumusaba alengeedhie Morodekai ku mulabba afe. Aye nti Hamani yamala yaatuuka ku ekyo kyene kye yali ategeike kituuke ku Bayudaaya, mwene ni batabane be bwe baabalengeedhia ku mulabba ni bafa.
26
Kale ennaku edho baadheeta Purimu, okuva mu liina Puri. Kale, olw'ebibono by'embaluwa eno, n'olw'ebyo byonabyona bye baabona ku nsonga eno, n'ebyo ebyabatuukaku,
27
Abayudaaya beeteekera eiteeka beene, n'abaana baibwe, n'abaaidhukulu, era n'omuntu owundi yeenayeena aba ng'afuuse Omuyudaaya, bati baidha kukuumanga butiribiri enaku edho eibiri nga dha kiidhukizo eky'ense n'ense, okusinziira ku ndagiriro empandiike n'okusinziira ku kiseera ekigere.
28
Abayudaaya baali n'okwidhukiranga era n'okukuumanga enaku edho edha Purimu mu biseera byaibwe byonabyona eby'omu maiso, aghazira kudheerabira naire.
29
Agho inhebantu Esitheri mughala wa Aminadabu ghalala ni Morodekai Omuyudaaya, baakozesa obuyinza obwidhuvu nga baghandiika embaluwa ey'okubiri egema ku Purimu.
30
Era Morodekai yaagheereza embaluwa eri Abayudaaya boonaboona, eri ebiketezo by'obwakyabazinga bwa Ahasuero ekikumi n'abiri n'omusanvu, n'ebibono by'emiraala n'amazima,
31
Bombi baatwala obuvunaanizibwa okubona ng'ekibinuko ekyo kibaagho era baasalagho nga baidha kukikuumanga, okwenda n'obutenda.
32
Kale ekiragiro kya Esitheri kyakakasa ensonga dhino edha Purimu, era kyaghandiikibwa mu kitabo.