Chapter
5
1
Ku lunaku olwokusatu, Esitheri yaavaala ebivaalo bye eby'obwainhebantu, yaayemerera mu luya olw'omunda olw'omu lubiri lwa kyabazinga, okwolekera endhu ya kyabazinga, kyabazinga nga atyaime ku ntebe ye ey'obwakyabazinga mu ndhu ey'obwakyabazinga, ng'alingiriire omulyango gw'endhu.
2
Kyabazinga bwe yabona inhebantu Esitheri ng'ayemereire mu luya, yaamugemerwa ekivunika, era kyabazinga yaagolola omwigo gwe ogwa zaabu ogwali mu mukono gwe eri Esitheri. Agho Esitheri yaaseeta yaagema ku mutwe gw'omwigo.
3
Kyabazinga yaamubuuza ati: "Kiki ky'oyenda, inhebantu Esitheri? Kiki ky'osaba? Kinaakugheebwa n'okutuuka ku kitundu eky'obwakyabazinga!"
4
Esitheri yairamu ati: "Kyabazinga bwoba ng'osiimye, kyabazinga aje ni Hamani leero ku mbaga ye nategeike."
5
Agho kyabazinga yaakoba ati: "Mundeetere Hamani mangu, akole nga Esitheri bw'akobye." Kale atyo kyabazinga ni Hamani baaja ku mbaga Esitheri ye yali ategeike.
6
Ku mbaga ey'omwenge, kyabazinga yaakoba Esitheri ati: "Kiki ky'osaba? Kinaakugheebwa. Era kiki ky'oyenda? N'okutuuka ku kitundu eky'obwakyabazinga, kinaakukolebwa!"
7
Agho Esitheri yairamu yaakoba ati: "Kye nsaba ni kye nnhenda ni kino:
8
Bwe mba nga ngemeirwa ekivunika mu maiso ga kyabazinga, era kyabazinga bw'anaaba asiimye okunkolera kye nsaba n'okutuukiriza kye nnhenda, kyabazinga ni Hamani baidhe ku mbaga ye naabategekera, n'enkyo ndidha kukola nga kyabazinga bw'akobye."
9
Ku lunaku olwo Hamani yaaja nga musanhufu era ng'ali n'omutima omusanhufu; aye Hamani bwe yabona Morodekai mu mulyango gwa kyabazinga, era nga tayemereire waire okukankana mu maiso ge, Hamani yaidhula obusungu eri Morodekai.
10
Aye Hamani yeefuga yairayo ewuwe, yaatumya bakagwa be ni mukazi ghe Zereshi.
11
Agho Hamani yaabasuutira obukombe bwe obungi, n'obungi bw'abaana be, n'ebintu byonabyona kyabazinga bye yali amukuziizamu, n'engeri gye yamukuza okusinga abakungu n'abasaadha ba kyabazinga.
12
Kabiri Hamani yaakoba nti: "N'ekindi inhebantu Esitheri tiyayeta muntu wundi okwidha ni kyabazinga ku mbaga gye yategese okutoolaku nze; era n'olwaleero ndheteibwa ghalala ni kyabazinga.
13
Aye byonabyona bino biziramu kantu yendi, buli lwe mbona Morodekai Omuyudaaya ng'atyaime ku mulyango gwa kyabazinga."
14
Agho mukazi ghe Zereshi ni bakagwa be boonaboona baamukoba bati: "Omulabba gukolebwe nga guli ghaigulu ku mpango dha mita oti makumi abiri na ibiri, n'olwaidho ku nkyo teesa ni kyabazinga nti Morodekai bamulengeedhie okwo; agho olyoke oje n'eisanhu ghalala ni kyabazinga ku mbaga." Ekyo kyasanyusa Hamani, yaalagira basimbe empango edhiriku omulabba ghaigulu.