Chapter
8
1
Ku lunaku olwo, kyabazinga Ahasuero yaagha inhebantu Esitheri ebintu byonabyona ebyali ebya Hamani, omuzigu w'Abayudaaya. Esitheri yaakobera kyabazinga nga Morodekai bw'amuliku oluganda, era okuva ku olwo Morodekai yaikirizibwa okwidhanga ye kyabazinga.
2
Kyabazinga yaatoolaku empeta ye eyakozesebwanga okuta akamanhiso ak'obwakyabazinga ku bighandiiko, ye yatoola ku Hamani, yaagigha Morodekai. Esitheri yaagha Morodekai obuvunaanizibwa ku bintu byonabyona ebyali ebya Hamani.
3
Agho Esitheri kabiri yaayogera ni kyabazinga. Yaakuba amakiryaivu gha bigere bya kyabazinga, yaamwegayirira nga bw'alira n'amaziga. Yaamusaba abeeku ni ky'akola okulobera olukwe Hamani lwe yali akoleire Abayudaaya.
4
Kyabazinga yaagololera Esitheri omwigo gwe ogw'obwakyabazinga ogwa zaabu. Kale Esitheri yaasituka, yaayemerera,
5
era yaamukoba ati: "Isebantu kyabazinga, bw'oba ng'osiimye era nga zeena onfaaku, lagira baghandiike ekiragiro ekisazaamu kire Hamani mutabane wa Hammedatha asimuka mu Agagi, kye yali ayiiyiiza okuzikiriza Abayudaaya abali mu biketezo byonabyona eby'obwakyabazinga bwo.
6
Nze nnaaguma ntya, ng'akabi ako kali kwidhira abantu b'eighanga lyange? Nnaalingirira ntya obulingirire, nga bali kuzikirizibwa?"
7
Kyabazinga Ahasuero yaakoba inhebantu Esitheri ati: "Bona eno, mmaze okulengeedheza Hamani ku mulabba yaafa, olw'okukola olukwe okwita Abayudaaya, era ebintu byonabyona ebibaire ebibye naabikugha.
8
Ekiragiro kye baghandiise mu liina lya kyabazinga, ni bakitaaku n'akamanhiso ak'empeta ey'obwakyabazinga, tikisoboka kusazibwamu. Aye muli ba idembe okughandiikira Abayudaaya embaluwa mu liina lyange nga bwe mubona, mwagitaaku n'akamanhiso ak'empeta ey'obwakyabazinga."
9
Kale ku lunaku olwabiri n'eisatu olw'omwezi ogusooka ogwetebwa Nisani, baayeta abaghandiisi ba kyabazinga. Baaghandiika embaluwa nga badhighandiikira Abayudaaya, abakungu, n'abafuzi ab'omu biketezo byonabyona ekikumi n'abiri n'omusanvu (127), okuva e Buyindi okutuuka e Sudani. Buli kiketezo baakighandiikira mu lulimi olw'abantu baakyo.
10
Embaluwa edho baadhighandiika mu liina lya kyabazinga, era baadhitaaku n'akamanhiso ak'empeta ey'obwakyabazinga. Baadhigemya abalumusi baadhitwala.
11
Mu mbaluwa edho kyabazinga yaikiriza Abayudaaya abaali mu buli kibuga okwebisa nga bajiira ku mateeka agaibwe ku bwaibwe. Yaabaikiriza n'okwesoloza beerwaneku, nga bazikiriza abazigu baibwe mu nsambo yoonayoona ye baba baboine.
12
Ekyo nga bali n'okukikola mu biketezo byonabyona kyabazinga Ahasuero bye yafuganga, ku lunaku lulala luti olweikumi n'eisatu mu mwezi ogweikumi n'ebiri ogwetebwa Adari.
13
Ekighandiiko ekyo kyali kya kugheebwa nga kiragiro mu biketezo byonabyona, era kyatangazibwa eri abantu boonabona, nga Abayudaaya bali beetegekeike ku lunaku olwo okwesasuza ku bazigu baibwe.
14
Abalumusi abaali beebagaire embalaasi edh'obwakyabazinga baaja nga bangugha, nga bakubiriza olw'ekiragiro kya kyabazinga. Ekiragiro ekyo kyagheebwa mu lubiri olwa Susani.
15
Morodekai yaafuluma mu maiso ga kyabazinga ng'avaire engoye edh'obwakyabazinga edha bululu n'endheru, n'engule ennene eya zaabu n'olugoye olughegheevu era olwa langi ya nakasooma; ekibuga Susani kyasanhuka inho era kyasagaaluka.
16
Abayudaaya baaba n'obutangaavu n'eisanhu, obusangaavu n'ekitiibwa.
17
Mu buli kiketezo na mu buli kibuga, ekiragiro kya kyabazinga n'eiteeka lye ghe byatuuka, Abayudaaya baali n'eisanhu okusagamba, embaga n'olunaku lw'okuwuumula. Abantu kamaala abamaghanga agandi baafuuka Abayudaaya, olw'okutya Abayudaaya.