Chapter
1
1
Mpegaano olwatuuka mu nnaku dha kyabazinga Ahasuero (ono yali Ahasuero eyaafuganga ebiketezo ekikumi n'abiri n'omusanvu, okuva e Buyindi okutuuka Ethiopia).
2
Mu nnaku edho, kyabazinga Ahasuero bwe yali nga atyaime ku ntebe ye ey'obwakyabazinga mu Susa ekifo eky'okwewogomamu,
3
mu mwaka gwe ogwokusatu ogw'obufuzi bwe, yaakola embaga eri abakungu be boonaboona n'abagheereza be, abaduumizi ab'e Perusia n'ab'e Media, n'abakungu, n'abafuzi ab'ebiketezo nga bali mu maiso ge.
4
Yaaboolesa obukombe bw'obwakyabazinga bwe obw'ekitiisa, n'obukalamu bw'ekitiisa kye ekinene okumala ennaku kamaala, enaku ekikumi n'ekinaana.
5
Ennaku edho bwe dhaagha, kyabazinga yaakola embaga ey'ennaku musanvu eri abantu boonaboona abaaligho mu kibuga ekikulu Susa, okuva ku bakulu okutuuka ku bato, mu luya olw'omu nnimiro ey'omu kisaagaati kya kyabazinga.
6
Ghaaligho entimbe edhaakolebwa mu ngoye empegheevu endheru n'edha bululu, edhaali dhisibiibwa n'emigugha egyakolebwa mu ngoye empegheevu era edha langi ya nakasooma, ku miigo gya feeza ni ku mpango edh'amabaale ag'omughendo; n'ebitanda byali bya zaabu ni feeza ku lubalaza olwali olwa'mabaale ag'omughendo agamirimiinha, n'aga langi ya bululu, n'amabaale ag'omughendo ameeru n'amairugavu.
7
Baagaba ebyokunhwa mu bibya bya zaabu, buli kibya nga kyawukana ku kiinaakyo, era omwenge gwa kyabazinga gwali mungi, ng'omutima omugabi ogwa kyabazinga bwe gwali.
8
Okusinziira ku mateeka, okunhwa tikwali kwa buwaze; kuba atyo kyabazinga bwe yali alagiire abakungu boonaboona ab'omu ndhu ye, nti bakole nga kiisi muntu yeenayeena bw'asiima.
9
Inhebantu Vashiti yeena yaakola embaga ey'abakazi mu kisaagaati eky'obwakyabazinga ekya kyabazinga Ahasuero.
10
Ku lunaku olwomusanvu, omutima gwa kyabazinga bwe gwali omusanhufu olw'omwenge, yaalagira Mehuman, Biztha, Harbona, Bigtha, Abagtha, Zethar, ni Carcas, abalaawe omusanvu abaali baweereza mu maiso ga kyabazinga Ahasuero,
11
baleete inhebantu Vashiti mu maiso ga kyabazinga, ng'avaire engule ey'obwainhebantu, alage obulungi bwe eri abantu n'abakungu, kuba yali mulungi inho okumogaku.
12
Aye inhebantu Vashiti yaaloba okuja ng'ekiragiro kya kyabazinga bwe kyali, ekyaleetebwa abalaawe; kale kyabazinga yaasungughala inho, n'obusungu bwe bwatumbuuka munda mu ye.
13
Agho kyabazinga yaakoba abasaadha abagezi abaamanha ebiseera (kuba etyo empisa ya kyabazinga bwe yali eri boonaboona abaali baidhi amateeka n'obwenkania,
14
abaasinga okuba okumpi naye nga ni Carshena, Shethar, Admatha, Tarshish, Meres, Marsena, ne Memucan, abakungu omusanvu ab'e Perusia n'e Media, abaali babona kyabazinga, era nga baali mu bifo ebya waigulu mu bwakyabazinga):
15
"Tukole tutya inhebantu Vashiti ng'amateeka bwe gali, kuba tagondeire kiragiro kya kyabazinga Ahasuero ekyamuleeterwa abalaawe?"
16
Memucan yairamu mu maiso ga kyabazinga n'abakungu ati: "Inhebantu Vashiti taiziiza musango ku kyabazinga yenka, aye ni ku bakungu boonaboona, n'abantu boonaboona abali mu biketezo byonabyona ebya kyabazinga Ahasuero.
17
Kuba ekikolwa kya inhebantu kinaamanhibwa abakazi boonaboona, memale balyoke banhoome baibaibwe mu maiso gaibwe, nga bakoba bati: 'Kyabazinga Ahasuero yalagira inhebantu Vashiti aleetebwe mu maiso ge, aye tiyaidha.'
18
Olunaku luno lwene abakyala abakungu ab'e Perusia n'ab'e Media banaakoba abakungu boonaboona aba kyabazinga nti baawuliire ku mpisa ya inhebantu. Kale ni ghaidha kubaagho okunhooma okungi n'obusungu.
19
Kyabazinga bw'asiima, ekiragiro eky'obwakyabazinga kifulume okuva y'ali, era kiwandiikibwe mu mateeka ga Baperusia ne Bamedia, kireme okukyusibwa, nti Vashiti taidha kuboneka mu maiso ga kyabazinga Ahasuero; era n'ekifo kye eky'obwainhebantu kyabazinga akiwe owundi amusinga obulungi.
20
Ekiragiro kya kyabazinga ky'anaakola bwe kinaamanhibwa mu bwakyabazinga bwe bwonabwona (kuba bunene), abakazi boonaboona banaagha baibaibwe ekitiisa, oba bakulu oba bato."
21
Ekibono ekyo kyasanhusa kyabazinga n'abakungu, era kyabazinga yaakola ng'ekibono kya Memucan bwe kyali.
22
Yaagheereza embaluwa mu biketezo byonabyona ebya kyabazinga, mu buli kiketezo ng'ebiwandiiko byakyo bwe byali, ni mu bantu boonaboona ng'olulimi lwaibwe bwe lwali, nti buli musaadha abe musengwa mu ndhu ye, era ayogere mu lulimi lw'abantu be.