Chapter
2
1
Ebyo nga biwoire, obusungu bwawa ku kyabazinga Ahasuero era yaaba nga takaayogera ku liina lya Vashiti. Aye era kyabazinga oyo yaasigala ng'akaalowoolereza ku ngeri ye yamusaliramu omusango ni gumusinga.
2
Kale ghaabaagho abaaghanga kyabazinga ku magezi, baakoba bati: "Musengwa kyabazinga, lwaki tonoonereza n'ofunayo ku baghala abeegha ababoneka obulungi era ab'empisa enungi?
3
Omale oteegho n'abakungu mu biketezo byonabyona ebiri mu bwakyabazinga bwo, basoloze abaghala abeegha boonaboona ababoneka obulungi, babaleete ghano mu ndhu yo ey'abakazi mu kibuga Susa. Memale babagemye Hegai, omulaawe wo alabirira abakazi, abalabirire. Era babaghe ebizigo eby'okwesiiganga, na buli kintu kye beetaaga.
4
Mu abo mw'olironda omughala y'oliba osinzeeku okwenda, waamufuula inhebantu mu kifo kya Vashiti." Kyabazinga yaabona ng'ago magezi malungi era yaagajiiraku.
5
Mu Susa mwene omwo mwalimu Omuyudaaya nga bamweta Morodekai, nga ise ni Yairo mutabane wa Shimei era mwidhukulu wa Kishi. Baali ba mu kika kya Benjamini.
6
Morodekai yatwalibwa mu bunhage e Babilonia ghalala n'abantu abandi, Nebukadinezzari eyali kyabazinga ow'e Babilonia be yatoola e Yerusalemu.
7
Morodekai yali nga n'akuuma omughala eyayetebwanga Esitheri mughala wa Aminadabu. Aminadabu oyo yali aba ise wa Morodekai omuto aye nga yafa, era nga ni mukazi we yeena yafa baaleka Esitheri nga muto. Abazaire abo bwe baafa, Morodekai yaalabirira Esitheri okutuusa bwe yafuuka omuntu omukulu. Omughala oyo ng'aboneka bulungi inho.
8
Ekirangiriro kya kyabazinga ekyo bwe kyalangirirwa, kyaleetesa abaghala abaguna kamaala mu kibuga Susa, nga n'Esitheri yeena ali mu abo. Era yeena yaatwalibwa mu kisaagaati kya kyabazinga, baamugemya Hegai eyalabiriranga endhu ey'abakazi ba kyabazinga.
9
Esitheri yaasanhusa inho Hegai, yaamuleetera okumugonzanga einho. Era Hegai tiyalwa, yaamugha ebyetaagibwa okwesiiga okumulungiya, era yaamugha n'emere ey'endhawulo ku y'abandi. Yaataagho n'abaghala musanvu abaalondebwa n'obwegendereza mu abo abaabanga mu kisaagaati kya kyabazinga, yaabamugha bamugheerezenga. Era Hegai ng'abisa bukalamu Esitheri n'abaghala abo be yamugha okumugheerezanga.
10
Esitheri ng'ajiira ku magezi Morodekai ge yamugha, yakuuma ekya mwene okuba Omuyudaaya ng'ekyama.
11
Buli lunaku, Morodekai yeebisabisanga emberi mu luya olw'endhu y'abakazi nga yeetegereza, asobole okumanha Esitheri bw'ali ni bwebamubisa.
12
Omughala yamalanga omwaka mulamba nga bali kumulungiya bulungiye, nga bakaali kumutwala ye kyabazinga: Yamalanga emyezi mukaaga nga bali kumusiiga omuzigo ogwetebwa mirra, kabiri yaamala emyezi egindi mukaaga nga bali kumusiiga obuwoowo n'omuzigo ogundi.
13
Ebyo olwamalanga okuwa ng'omughala oyo agheebwa omuntu amugherekeraku okuva mu ndhu ey'abakazi, okumutwala ye kyabazinga.
14
Eyo baamutwalangayo igulo, aye enkyo ku lunaku olwaiririranga baamutoolayo baamwiza mu ndhu ey'abakazi eyindi eyalabirirwanga Hegai omulaawe. Era omughala oyo tiyairangayo ye kyabazinga kabiri, okutoolaku nga kyabazinga mwene amwese eriina lye.
15
Agho ekiseera kyatuuka okutwala Esitheri mughala wa Aminadabu ye kyabazinga Aminadabu oyo nga ni ise wa Morodekai omuto. Esitheri yali amaze okukola byonabyona Hegai bye yamugalagira okukola, era nga buli amubona amwegomba.
16
Kale mu mwezi ogweikumi n'ebiri ogwetebwa Adari, mu mwaka ogwomusanvu nga kyabazinga Ahasuero n'afuga Perusia, Esitheri baamutwala ye kyabazinga oyo Ahasuero.
17
Kyabazinga yaatwalirizibwa inho Esitheri era yaamwenda, kuba yamusanhusa okuwula abaghala bale abandi boonaboona. Era yaamuvaaza engule ey'obwainhebantu ku mutwe gwe.
18
Agho kyabazinga yaakola embaga enene ey'obugole ng'afumbiirwa Esitheri oyo. Embaga yaamala enaku musanvu, nga kuliku abakungu be boonaboona n'abafuzi be ab'omu biketezo. Ekindi yaalagira okukendeeza ku misolo egyali gisolozebwa mu biketezo byonabyona eby'omu bwakyabazinga bwe.
19
Mu kiseera ekyo Morodekai baali bamaze okumugha ekifo ekya ghaigulu ng'omufuzi.
20
Esitheri yali akaali kumanhisa bantu nga mwene Muyudaaya, kuba Morodekai yamulobera okukobera omuntu yeenayeena, era Esitheri yaamugondera mu ekyo nga bwe yamugonderanga ng'akaali muto nga Morodekai oyo akaamulabirira. Era tiyalekayo mpisa dhe edh'Ekiyudaaya, ng'asinza Katonda era ng'agondera ebiragiro bye.
21
Kyabazinga bwe yakuza Morodekai n'amugha ekifo ekya ghaigulu, abalaawe ababiri abaali abakulu mu kikunsu ekyakuumanga kyabazinga baasungughala era baasala olukwe baite kyabazinga oyo.
22
Morodekai yaiguka mu lukwe olwo, yaakoberaku inhebantu Esitheri, era yeena yaaja yaakobera kyabazinga eby'olukwe olwo.
23
Kyabazinga yaalagira babuuze abasaadha abo ababiri ku nsonga eyo. Bwe baamala, bombi baabaghanika ku kabaawo baabaita. Kyabazinga yalagira ekintu ekyo eky'omughendo Morodekai kye yakola, bakighandiike mu kitabo eky'ebyafaayo eby'obwakyabazinga kiidhukirwenga, olwo kigheese Morodekai oyo ekitiibwa.